دكتور كبير ومعروف يصرف علاج بالخطأ لأحد مرضاه<<دعوه للنقاش

مازال مسلسل الأخطاء الطبية يتكرر كل يوم أمام اعيننا ,, فهذا طبيب تسبب باعاقة احد الاطفال,, والاخر تسبب بالعمى الدائم لاحد مرضاه,, والاخر وصل به التهاون الى قتل نفس برئيه.. وكل يوم نقرأ ونسمع عن حالة حدث بها خطأ طبي كبير دون أن يكون هناك تحرك من قبل المسؤلين واذا تنازلوا فأقل مايعملونه هو فصل ذاك الجزار ليجد مجزرة اخرى تحتضنه.. ويبقى ذاك المريض المسكين بعلته تلازمه مدى الحياة دون ان يشفي غليله..


مادفعني للكتابة اليوم ماحصل لقريبتي,, ولأكون صريحه معكم بل هي أختي الأكبر مني سنا.. حيث تعاني من تخلف عقلي شديد وتوحد وصعوبة في النطق وهذا منذ الولاده والسبب في ذلك هو نقص الاوكسجين في الدم في فترة ماقبل الولادة ..
المهم وانها من صغرها وهي تراجع في مستشفى الملك فهد بالحرس الوطني بالرياض تحت اشراف دكتور من الجنسية السودانيه’ كلمة كفء بحقه لاتوفيه كان مجتهد وذو اخلاق عاليه وكانت اختي نوعا ما مستجيبه للعلاج معه((ماأدري يمكن لانها وهي صغيره تكون حالتها نوعا ما سهل التعامل معها ,, لان مانلاحظه عليها انها كل ماكبرت في العمر كل مازادت حالتها للأسوأ وتعقدت اكثر)) مع العلم ان عمرها الان 23
مع الوقت تم نقل حالتها عند دكتور سعودي كبير ومعروف في مجال الطب النفسي<<<ومن زين الحلايا كل يوم راز لي وجهه في التلفزيون على ايش يستضيفونه مدريمالكم بالطويله... اختي كانت في البداية اذا جاء وقت موعدها تروح عادي فكان ماعنده غير انه يتأمل خلقتها ويكتب<< مدري وش يكتب بس انه يكتبودقيقتين وانتهى كل شي.. ومع الوقت البنت جت حاله ماتطلع من البيت الى وقتكم هذا فكان اذا جاء وقت موعدها تروح الوالده واحد معها وعلى أساس اللي نقوله يكتب العلاج وماعنده غير انه يزيد وينقص بعدد الحبوب<< تقول داخلين مزاد مو عيادة
وفي يوم من الايام وبقدرة قادر ولما كنا عند الصيدلية بنصرف العلاج الا والصيدلانيه قاعده تعرف بالعلاج واحد واحد وقالت : هذا علاج التشنجات’’ طبعا الوالده انصدمت وقتها وقالت لهم ان البنت ماعندها حالة تشنجات ,, فما كان من اخوي الا انه طلع للحققير فوق وقاله وشلون تصرف علاج للبنت بالغلط فقال اكيد مو انا ,, هنا ارتفع ضغط اخوي وعصب عليه وقاله وشلون يكتبها غيرك وانت المسؤول عن حالتها واذا ناوب غيرك بدالك كتب اللي انت كتبته ,, ولما رجع للأوراق اللي عنده عرف ان الغلط منه وقال بكل برود: خلاص بس مايصير اقطع العلاج بالسرعه هذي لازم يكون بشكل تدريجي لانها تعودت عليه..(( تخيلوا بس علاج تشنجات ويصرف للمسكينه لاكثر من سنه))طبعا اللي يقول لنا اقطعوه منها واللي يقول اسمعوا كلام الزففت لانه هو ادرى والكلام يكثر,,بس اذا تبون الجد البنت اوقات نوعا ما تتغير علينا شوي حالتها ,, ماراح اظلمه واقول من العلاج هذا لاني سمعت عن اهل التوحد انهم كذا يصير لهم حاله معينه يمسكون عليها وبعد كذا يتغيرون ويصير طبعهم ياخذ منحى ثاني,,والعلم عند الله.. والحين تقريبا حالتها زينه مثل دايم يعني مافيها شي جديد ملاحظينه عليها

ويمكن العلاج اللي هو صرفه مايضر مرره مثل ماقال ناس كثير ,, بس ولو كون انه غلط بصرف العلاج لوحده مسكينه ماتدري فهذا بحد ذاته اكبر جريمه ناتجه عن اهمال منه.. وبيتصرف كذا مع مرضى كثير غيرها وبنفس الاهمال واللامبالاه..

في اخر مره كان لها موعد قبل شهر تقريبا و تحمست اني اروح مع الوالده ولو حصل كنت ناويه اتناقش معه لانه يظن انا نسينا السالفه خلاص.. المهم طلع ماخذ اجازه وناوبت عنه دكتوره ثانيه مررره عسل وقلت لها نبي ننقل ملف البنت عندك قالت لي اسفه عندي مرضاي وعنده مرضاه بعدين الدكتور( ) دكتور ممتاز ..
وهي تكتب العلاج وتناظر ملف البنت صرفت علاج للتشنجات لما قلت لها ان احنا قاطعينه منها قالت لا هو كاتبه لها بس يصرفه بعلبه مختلفه<< تخيلوا وين وصلت معاه لانه قبل قال لنا اني غيرته ,, طبعا ماكان منا الا اننا اخذناه ونمشي على الوصفه لانهم حتى اذا اغلطوا هم ادرى كيف يتصرفون بعدها..

وشي ثاني يرفع ضغطي كل مااروح مع الوالده للمستشفى.. غير هاللي قلته عنه دكتور غير منضبط بمواعيده’ الموعد يكون الساعه 12 يجي الساعه 2 ونص وينافخ بعد,, واذا سألنا وين الشيخ قالوا: يداوم في عيادته<<< والله من صادق الفلوووس.


على فكره انا ماعندي اشكاليه اقول لكم اسم هذا الدكتور اذا تبون بس قلت يمكن الاداره تمنع شي زي كذا.. واسفه اذا طولت عليكم واشغلتكم بس هذا لمجرد التنبيه ان مو كل واحد يرزونه بالتلفزيون ويكون معروف انه خلاص توب ومايغلط لا طبعا ,, على العموم الله يشفي الجميع وتحياتي لكم..

لاتحرموني ردودكم

لاحول ولاقوة الا بالله المفروض هاذا الدكتور ترفعون عليه قضيه الحمد لله الي ماصار للبنت شي

بس كمان لازم تعطونه قرصة اذن عشان مايتهاون ويسوي حركات زي كذا

ولاتخافون منه عشان كبير ماكبير غير الله


سوري انفعلت مع الموضوع بس من جد نرفزني ذا الدكتور حسبي الله عليه

الله يشافي اختك ويخليها لكم ان شاء الله

وموضوعك فيه فايده كبيره عشان الناس تنبه وتعرف العلاج الي ياخذونه عيالهم ولاهم

مشكور عن جد عالموضوع

تحياتي

بنت الحبلاني

الله يهديهم

ومفروض مانتهمه لان الرسول قال

((عفي عن أمتي الخطاء والنسيان وماستكرهوا عليه))

ومشكوره على هيك مواضيع

تقبلي مروري

بنت الحبلاني مشكوره على تفاعلك ,, ومن قال انا خايفين منه او شي بالعكس هو اخر همنا,, بس يمكن لان الاهل شافوا البنت تقريبا ماصار عليها شي .. فغضوا النظر عن السالفه,, بس قلت مايمنع اني اكب وانبه غيري

يعطيك العافيه على وجودك ,, لاخلاو لاعدم

انا كذا

قاعده اقول لك صرف علاج بالخطأ وقال انه اخطأ تقولي مانظلمه,,
وانا معك كلنا نغلط ونخطي بس نتعلم من اخطائنا

مشكور على مرورك