ألا يالله عفوك لامعي بيجر ولا جوال

ألا يالله عفوك لامعي بيجر ولا جوال



ولا عندي وضيفه والتجاره فاشلن فيها




ولا عندي شهادات ولا حرفه تسد الحال




ولا حظ كبير لأخطت الجره يقدمها



مخابي الثوووب تومي مادخلها من زمان ريال



بها فاتورة الكهرب ولا يمدي اقضيها


على ذيك العراوي تتعب الحادي مع الجمال


ثلاث شهوور بالورشه وشهرين مغطيها


ابيها لو تجمل يوم واجلبها على الدلال



يجيها واحد حظه مثل حظي ويشريها


نصيت العسكريه يوم قالوا النظام ارجال


وقدمت الملف وصورة شخصيه متشخص فيها



خذ الاوراق مني واحد ماعند ابوه دلال


سلوم الناس واهل المعرفه والطيب مخطيها


قراها في دقيقه والتفت عجل علي وقال


شهادتك العظيمه يولد وين انت مخفيها


اهز الراس ماعندي تقول اني من البنغال

وقمت احب خشمه وطلبه بالله تمشيها


حذفها من يده شين الطبيعه والنبأ والفال


وقال زين صوب نوقاتك تعشيها


تناوشته من الكرسي وعفت الحل والترحال


وضربته بالبياله عقب مابيحت شايها


خذووني للسجن لانيب بال ظالم ولا محتال


مجرد واحد جا يكحل عيوونه فيعميها


ويومني خرجت اقفيت لا رض الله وسيع الحال


ادور قصعة الجربوع والضب والفتي يحتال



والارنب ياشفاة الرووح محلاها وطاريها



بال كهرب ولا بيجر ولا غاز ولا نقال


قوانين الحضاره لاتبي شوفي ولا ابيها